(PAP) Awe ta nan porta. Mañan por ta esun di bo

Imagina cu bo ta drumi den bo propio cas. Den bo cama. Den e lugar cu, mas cu tur otro lugar, mester ta sinti sigur.

Di repente bo ta spierta cu boroto, grito, porta cu ta wordo kibra y arma punta riba bo.

Bo no ta sospechoso. Bo no ta den ningun investigacion. Bo no a haci nada.

Pero toch, bo ta para den bo propio cas como si bo fuera un criminal.

Esaki no ta un escena di pelicula. Segun e peticion formal entrega na Parlamento di Aruba, esaki ta loke varios habitante di un complejo di apartamentonan na Tanki Leendert a experiencia durante un operacion policial den anochi di 5 di augustus 2026. E operacion tabata dirigi contra persona sospechoso cu, aparentemente, tabata biba den un di e ocho apartamentonan. Pero e otro famianan no tabatin nada di haber cu e investigacion.

Y toch, nan cas tambe a bira escenario di forsa estatal.

E pregunta ta simpel:

Si autoridad ta busca un persona den un apartamento, esaki ta duna nan derecho pa trata tur otro famia den e luga como sospechoso?

Segun e habitantenan, autoridad tabatin potret di e persona cu nan tabata busca. Pero nan no a puntra un bisiña. Nan no a puntra e doño di compleho di apartament. Nan no a verifica prome cua porta tabata e porta corecto.

Un solo pregunta por a cambia tur cos.

Esaki ta precisamente pakico nos tin derecho constitucional.

Derecho no ta un luho pa momento cu tur cos ta trankilo. Derecho ta existe precisamente pa momento cu Estado ta yega na bo porta cu poder, uniform y arma.

Segun e peticion, den e siete apartamentonan nan no a wordo mustra un copia di e autorizacion pa drenta. E habitantenan no a haya copia. No tabatin identificacion previo. Y e rapport skirbi di e drentamento tampoco no a yega manera ley ta exigi.

Esaki no ta un discusion teoretico. Nos ta papia aki di hende di carni y weso cu a haya miedo. Nan a wordo lastra. A haya kap na cabes. Nan a wordo humiya sin motibo.

E habitantenan aki despues mester a bolbe drumi den e mesun cas unda nan a sinti nan mes completamente impotente.

Y despues tin un otro peligro: cu nos a normalisa esaki.

Media a bisa: “Anto? Polis tabata haci nan trabou.” Si. Polis mester por haci nan trabou, sin duda.

Pero precisamente pasobra e Estado tin poder pa usa forsa contra su ciudadano, nos mester ta mas exigente cu e manera con e poder ey ta wordo usa.

• 

• 

• 

• 

• 

Un sociedad liber no ta midi su libertad solamente na con e ta trata esun culpabel.

E ta midi su libertad pa con e ta proteha e inocente.

Pa e motibo ey, na nomber di e habitantenan afecta, un peticion formal a wordo presenta na Parlamento di Aruba, pidiendo pregunta, responsabilidad y medida corectivo.

Pasobra e asunto aki ta mas grandi cu un compleho di apartament na Tanki Leendert.

Awe ta nan porta.

Mañan por ta bo porta.